கேப்டன் விராட் கோலியின் செயல்… பெங்களூருக்கு 5 ரன்கள் அபராதம்..? ஆதரவு தெரிவித்த சச்சின்!

    0
    61

    டெல்லி கேபிடல்ஸ் அணிக்கு எதிரான போட்டியில் பீல்டிங் செய்து கொண்டிருந்த ராயல் சேலஞ்சர்ஸ் பெங்களூர் அணி கேப்டன் விராட் கோலி, எதிர்பாராதவிதமாகப் பந்தில் உமிழ் நீரைத் தேய்த்தார். உடனே சுதாரித்துக் கொண்ட அவர், தான் செய்தது தவறு எனத் தெரிந்ததும் அனைவரிடமும் மன்னிப்பு கேட்பதுபோல் சைகை செய்தார். நவ்தீப் சைனி வீசிய மூன்றாவது ஓவரின் மூன்றாவது பந்தை பிரித்வி ஷா, ஷார்ட் கவர் திசை நோக்கி ஓங்கி அடித்தார். பந்தைத் தடுத்த விராட் கோலி, எதிர்பாராத விதமாகப் பந்தில் உமிழ் நீரைத் தேய்த்தார். இது ஐசிசியின் மருத்துவப் பாதுகாப்பு விதிமுறைகளின்படி குற்றமாகும்.

    உடனே, சுதாரித்துக் கொண்ட கோலி, மன்னிப்பு கேட்பதுபோல் சைகை செய்தார். இதுகுறித்து பலர் ட்வீட் செய்துவந்த நிலையில், கிரிக்கெட் ஜாம்பவான் சச்சின் டெண்டுல்கரும் ட்வீட் வெளியிட்டுள்ளார். “பிரித்வி ஷா சிறப்பான முறையில் ஷாட் அடித்தார்.

    அதைத் தடுத்த விராட் கோலி எதிர்பாராத விதமாகப் பந்தில் உமிழ் நீரைத் தேய்த்து, தவறை உணர்ந்ததும் மன்னிப்பு கேட்பதுபோல் சைகை செய்தது அற்புதமான தருணம். சில நேரங்களில் உள்ளுணர்வுகளை தடுப்பது கடினம்” எனப் பதிவிட்டுள்ளார்.

    ஐபிஎல் 13ஆவது சீசனில் இதற்குமுன், ராஜஸ்தான் ராயல்ஸ் அணி பேட்ஸ்மேன் ரோபின் உத்தப்பா கொல்கத்தா அணிக்கு எதிரான போட்டியின்போது பந்தில் உமிழ் நீரைப் பயன்படுத்தினார்.

    கொரோனா காரணமாக, பந்தில் உமிழ்நீரை பயன்படுத்தக் கூடாது எனக் கடந்த ஜூன் மாதம் ஐசிசி அறிவித்திருந்தது குறிப்பிடத்தக்கது. ஐசிசி வெளியிட்டுள்ள மருத்துவப் பாதுகாப்பு விதிமுறைகள் அடங்கிய குறிப்பில், “வீரர்கள் முதல்முறை பந்தில் உமிழ் நீரைப் பயன்படுத்தினால், தண்டனை எதுவும் வழங்கப்பட மாட்டாது.

    தொடர்ந்து அதேபோல் செய்தால், நடுவர்களால் எச்சரிக்கப்படுவார்கள். போட்டியில் இருந்து வெளியேற்றப்படவும் வாய்ப்புள்ளது. உமிழ் நீர் பயன்பாடு விஷயத்தில், ஒரு அணிக்கு இரண்டுமுறை எச்சரிக்கை விடுக்கப்படும். மீறும் பட்சத்தில் 5 ரன்கள் அபராதமாக விதிக்கப்படும்” எனத் தெரிவிக்கப்பட்டுள்ளது.