யாழில் நால்வருக்கு கொரோனா தொற்று உறுதிசெய்யப்பட்டது

0
42

யாழ்.போதனா வைத்தியசாலையில் நேற்று மேற்கொள்ளப்பட்ட கொரோனா தொடர்பிலான பரிசோதனை முடிவுகளில் நால்வர் கொரோனாத் தொற்றுக்கு உள்ளாகியுள்ளமை உறுதிப்படுத்தப்பட்டுள்ளதாக யாழ்.போதனா வைத்தியசாலைப் பணிப்பாளர் த.சத்தியமூர்த்தி தெரிவித்துள்ளார்.

கொரோனாத் தொற்று தொடர்பில் நாளாந்தம் வெளியிடுகின்ற அறிக்கையிலேயே அவர் இதனைத் தெரிவித்துள்ளார்.

அந்த அறிக்கையில் தெரிவிக்கப்பட்டுள்ளதாவது.

நேற்றைய பரிசோதனையில் விடத்தல்பளை தனிமைப்படுத்தல் நிலையத்தை சேர்ந்த நான்கு பேருக்கு கொரோனா தொற்று உறுதி செய்யப்பட்டுள்ளது. (இவர்கள் நால்வரும் கடந்த மாதம் சவுதி அரேபியாவில் இருந்து நாடு திரும்பியவர்கள்)

அனைவரும் மேலதிக COVID 19 சிகிச்சைக்காக விஷேட வைத்தியசாலைக்கு அனுப்பி வைக்கப்பட்டுள்ளனர்.

அண்மைக்காலங்களில் தனிமைப்படுத்தல் நிலையங்களில் தொற்று கண்டு பிடிக்கப்பட்ட அனைவரும் வெளிநாடுகளில் இருந்து வந்தவர்கள் என்பது குறிப்பிடத்தக்கது.

இதே சமயம் வட பகுதியில் பல்வேறு இடங்களிலும் செய்யப்பட்ட பரிசோதனையில் தொற்று ஒருவருக்கும் இல்லை என உறுதி செய்யப்பட்டுள்ளது.

எனவே மக்கள் இது விடயம் தொடர்பாக அச்சம் கொள்ளத் தேவையில்லை.

பொதுமக்கள் தங்களது அன்றாட கடமைகளையும் செயற்பாடுபளையும் தொடர்வதுடன் சுகாதார அமைச்சினால் COVID 19 தொற்று தவிர்த்தல் தொடர்பாக வழங்கப்பட்ட சகல அறிவுறுத்தல்களையும் பின்பற்றி நடந்து கொள்ளவும்.

நேற்று 130 பேருக்கான பரிசோதனைகள் யாழ் போதனா வைத்தியசாலை ஆய்வு கூடத்தில் மேற்கொள்ளப்பட்டன. பரிசோதனைக்குட்பட்டவர்களின் விபரங்கள் :

  • போதனா வைத்தியசாலை விடுதிகளில் அனுமதிக்கப்பட்டவர்கள் – ஒருவர்
  • போதனா வைத்தியசாலை வெளி நோயாளர் பிரிவில் பரிசோதிக்கப்பட்டவர்கள் – 3 பேர்
  • பொது வைத்தியசாலை கிளிநொச்சி – ஒருவர்
  • தனிமைப்படுத்தல் நிலையம் விடத்தல்பளை -125 பேர் ( நால்வருக்கு தொற்று உறுதி)